من شكلك انت سحنون ونوعك هادي ....... بلا مواخده مانك متع زرادي ....
مانك متع جفاره ... ومانك اللي اهلك تريس عصاره ...
حتى عيشتك عايش حياة حضاره ... بحدا ليلى وكل يوم تبدأ غادي ...
ولا تعرف الحضره من الزكاره .... كله سوا عندك تراب بلادي ...
إنضنك إلا تسمع لناس نصارى ... إل يترادحو مع بعض بالتعدادي ...
وتشطح معاهم وعندك الرقص مهاره ... ولا تعرف حشم عندك كله عادي ...
وفي طلعتك لازم من النضاره ... ولبسك مرقع تقول لبس تشادي ...
وفطورك من البريوش تاخد حاره ... حسابك إنت والبنت اللي في النادي ...
وغداكم مسلفر بخضرته وخياره ... وتقولو على البازين حي مرمادي ...
وفلوس بوك كاسبها كما القمارة ... وقرش الحرام ماينفعش حتى زرادي ...
كل شيكم أعوج عليك خسارة ... ماتعرفو مابين هادي وهادي .....
وتسمو في مهند وأخته ساره .... ماتسموش لا مطيره ولا البغدادي ...
لا تعرفو لا التنور ولا وقيدة ناره ..... والخبز يوصلكم فرادي فرادي ......
ولا عندكم غيره ولا حزّاره .... تشوفو العوج وتفوتوه تقولو عادي ....
مانك متع زرداي ....
من شكلك انت سحنون ونوعك هادي ....... بلا مواخده مانك متع زرادي ....
السبت فبراير 14, 2009 7:33 am
